Chehare Pe Mere Zulf Ko Phailaao Kisii Din

Chehare Pe Mere Zulf Ko Phailaao Kisii Din

Kyaa Roz Garajate Ho Baras Jaao Kisii Din

Raazon Kii Tarah Utaro Mere Dil Men Kisii Shab

Dastak Pe Mere Haath Kii Khul Jaao Kisii Din

Pedon Kii Tarah Husn Kii Baarish Men Nahaa Luun

Baadal Kii Tarah Jhuum Ke Ghir Aao Kisii Din

Khushbuu Kii Tarah Guzaro Mere Dil Kii Galii Se

Phuulon Kii Tarah Mujh Pe Bikhar Jaao Kisii Din

Phir Haath Ko Khairaat Mile Band-E-Qabaa Kii

Phir Lutf-E-Shab-E-Vasl Ko Doharaao Kisii Din

Guzaren Jo Mere Ghar Se To Ruk Jaayen Sitaare

Is Tarah Merii Raat Ko Chamakaao Kisii Din

Main Apanii Har Ik Saans Usii Raat Ko De Duun

Sar Rakh Ke Mere Siine Pe So Jaao Kisii Din


Khamosh Ho Kyon Daad-E-Jafaa Kyuun Nahiin Dete

Khamosh Ho Kyon Daad-E-Jafaa Kyuun Nahiin Dete

Bismil Ho To Qaatil Ko Duaa Kyuun Nahiin Dete

Vahashat Kaa Sabab Ruuzan-E-Zindaan To Nahiin Hai

Mahar-O-Maah-O-Anjum Ko Bujhaa Kyuun Nahiin Dete

Ik Ye Bhii To Andaaz-E-Ilaaj-E-Gam-E-Jaan Hai

Ai Chaaraagaro Dard Badhaa Kyuun Nahiin Dete

Munsif Ho Agar Tum To Kab Insaaf Karoge

Mujarim Hai Agar Ham To Sazaa Kyuun Nahiin Dete

Rahazan Ho To Haazir Hai Mataa-E-Dil-O-Jaan Bhii

Rahabar Ho To Manzil Kaa Pataa Kyuun Nahiin Dete

Kyaa Biit Gaii Ab Ke ‘Faraz’ Ahal-E-Chaman Par

Yaaraan-E-Qafas Mujh Ko Sadaa Kyuun Nahiin Dete